أولا.. أنا اسمى مونيكا نبيل عزيز موريس..أبويا لوحده اسمه نبيل_عزيز (اسم مركب) و دى مش آخر حاجة غريبة هتلاقيها هنا :D خريجة كلية إعلام بجامعة القاهرة.. عندى 22 سنة..موليد برج الميزان
بيقولوا بتوع برج الميزان دايماً فنانين..وأنا محبش أخذلهم اللي بيقولوا دول.. بحب الرسم و التمثيل :) أدبياً بكتب كويس لكن مش مهتمة بالموضوع بشكل كبير.. يمكن عشان بحس الكتابة مبتأكلش عيش..فا بستخدمها للتنفيث.. لما بكون مضايقة بيجيلى نوع من أنواع الإسهال الفكرى -مقرفة أوى- فا بقعد أكتب أكتب لحد ما أوصل اللى نفسى أوصفه..
مش بحب أكتب خواطر، بحسها مش هتفيد اللى قدامى ف حاجة..فا بحب أصيغ أى فكرة أو خاطرة تجيلي ف قالب "قصة-قصيدة-مشهد من مسرحية" و هكذا.. القصص مش مملة مطلقاً و القصائد -لو فيها مزيكا- ممتعة دائماً :) وانا بحب لما أكتب أريح اللى بيقرأ..عشان أتفهم مش أكتر :)
المهم أنا كنت مقضياها نوتس ع الفيس بوك..و تويتات على تويتر.. وبعدين ولاد الحلال نصحونى أعمل بلوج أحط فيها أفكارى..العبده لله دخلت الموقع ولا فاهمة أى حاجة يادوبك سجلت و غيرت الخلفية -بحب اللون الأحمر فا رزعت أول حاجة حمرا لقيتها- و بعدين قعدت أدوس على زرايركتيرة لحد ما لقيت الحتة الفاضية دى و لقيت ينفع أكتب فيها.. و أنا بصراحة مايهونش عليا ألاقى حتة فاضية و مكتبش عليها :D بعتبره هدر للمساحات :D
و بطبيعة الحال -الاعتراف بالجهل فضيلة- معرفش أساساً مين ممكن يقرأ الكلام ده و إيه اللينك بين الناس الجديدة و الناس القديمة، أنا يدوبك مستوعبة تويتر من شهرين :D كان بقالى 4 سنين مغمورة ف عالم الفيس بوك و من قبليهم -أعترف- كنت ملطوطة ف عالم الhi5 و ال ICQ ..بس خلاص من غير شتيمة..عارفة إنها كانت أيام زبالة إلهى لا يرجعها..بس على أيامنا بقى مكنش فيها غير كدة..حاسة إني بقيت أبيض ف أسود..عابوكو كلكو أنا عندى 22 سنة :D
المهم..لو حد قرأ و فهم حاجة يقولى..لو حد قرأ و عجبه حاجة يقولى.. لو حد قرأ و معجبوش ولا حاجة يقولى برضه.. لو حد مقراش (على افتراض إن البي بي سي هتهمل نشر الكلام الجامد جدا ده) يقولى عشان أفهمه غلطه :D
شكرا :)
